GUJARAT

વલસાડમાં એકાએક 1 કિ.મી જમીન બેસી જતાં લોકોમાં ફફડાટ, એક સ્થળે 85 મીટર લાંબો અને 7 ફૂટ ઉંડો ખાડો પડ્યો

સંઘપ્રદેશ દાદરા નગર હવેલી તથા સરહદી વલસાડ જિલ્લાના વિસ્તારમાં તા.4થી સપ્ટેમ્બરે સવારે તા. 5મી સપ્ટેમ્બરે રાત્રે ભૂકંપના હળવાથી ભારે ઝાટકા આવતા, લોકોમાં ભયનો માહોલ પ્રસરી ગયો છે. પરંતુ સૌથી વધુ ચોંકાવનારી અને ચિંતાજનક ઘટનામાં કપરાડા તાલુકાના ગિરનારા ગાંમે શનિવારે ભૂકંપના આંચકાથી ગામના પારસપાડા ફળિયામાં આવેલી નળગદેવ હિલ ઉપર સ્થિત સરકારી શીરપડતર જમીનમાં આશરે 1 કિમી સુધીના વિસ્તારમાં મોટી તિરાડો પડી ગઈ છે. ભૂકંપનું સંભવત: કેન્દ્રબિંદુવાળી જગ્યાએ આશરે 85 ફૂટ લાંબી અને 7 ફૂટ ઉંડા જેટલી જમીન ઘસી પડી છે. એ જગ્યાની આસપાસના વિસ્તારમાં આવેલી જમીનમાં ઠેકઠેકાણે તિરાડ પડી જતા લોકોમાં ગભરાટ ફેલાયો છે.

કપરાડા તાલુકાના ડુંગરાળ વિસ્તારોમાં વર્ષોથી ભૂકંપના આંચકા અનુભવવામાં આવી રહ્યા છે. કેટલાક જાણકારો, ક્વોરીમાં ટેટા ફોડવાને કારણે ધરા ધ્રુજી જતી હોવાનો તર્ક કરતા તો કેટલાંકે ભૂકંપના આંચકા અનુભવ્યા હોવાનો મત દર્શાવ્યો હતો. સંબંધિત સરકારી તંત્ર દ્વારા આ મુદ્દે તપાસો કરાઈ પરંતુ કોઈ નક્કર કારણો બહાર આવ્યા નહોતાં. દરમિયાનમાં ગત તા. 04-09-2020ના રોજ રાત્રે દાદરા નગર હેવલી તેમજ વલસાડ જિલ્લાના સરહદી ગામો ઉપરાંત વલસાડના શહેરી વિસ્તારોમાં ભૂકંપના આંચકા અનુભવાયા હતા. દાદરા નગર હવેલીમાં આવેલા ભૂકંપની રિક્ટર સ્કેલ પર તીવ્રતા 4.0 નોંધાઈ હતી. જેનાથી કોઈ મોટું નુકસાન થયું નહોતું.

પરંતુ તા.5મીઓ 10 વાગ્યે કપરાંડાના ગિરનારા ગામના પારસપાડા ફળિયાના નળગદેવ વિસ્તારમાં હિલ ઉપર સરકારી શીરપડતર જમીનમાં ભૂકંપના જોરદાર આંચકા આવ્યા હતાં. જેને કારણે આશરે 1 કિ.મી કરતા વધુ વિસ્તારની જમીનમાં મોટી મોટી તિરાડો પડી ગઈ હતી. કેટલાંક ઠેકાણે તિરાડોની સાથે જમીન ધસી પડી હતી. નજીકમાં આવેલા રહેણાંક વિસ્તારમાં જમીનમાં કંપન અનુભવાયું હોવાનું ગ્રામજનોએ જણાવ્યું હતું.

સ્થાનિકોના જણાવ્યાનુસાર છેલ્લા ત્રણેક દિવસથી રોજ રાત્રે ભૂકંપના હળવા આંચકા અનુભવી રહ્યાં હતાં. જેને કારણે જમીન થોડી થોડી ઘસતી જઈ રહી હતી. પરંતુ તા. 5મીએ સવારે ભૂકંપની તીવ્રતા વધુ હોવાથી એક ઠેકાણે આશરે 85 ફૂટ લંબાઈની જમીનમાં 7 ફૂટથી વધુ ઉંડાઈનો મોટો ખાડો પડી ગયો છે. આ સ્થળથી રહેણાંક વિસ્તાર આશરે 800 મીટર દૂર આવ્યો છે. અહીં આવેલા ઘરોને ભૂકંપથી કોઈ નુકસાન થયું નથી.

Leave a Reply

Your email address will not be published.